Beaivádehkot Suoma abortalága 2020-lohkui!
Vuoigatvuohta friddja ja dorvvolaš áhpehisvuođa gaskkalduhttimii lea guovddáš oassi nissoniid rumašlaš iešmearridanvuoigatvuođas ja vuoigatvuođas mearridit ieš iežas eatnáneamis.
Suoma láhka áhpehisvuođa gaskkalduhttimis ii gudnejahte áhpehis olbmo iešmearridanvuoigatvuođa. Láhka lea 50 jagi boaris ja čavgat eará Eurohpá riikkaid ektui. IežasDáhttu2020-kampánja ulbmil lea lága beaivádeapmi otná beaivvi máilbmái!
Manin dárbbašit láhkanuppástusa?
Áhpehis olbmo iežas dáhttu ii reahkká gaskkalduhttima oažžumii Suomas. Láhka gáibida gaskkalduhttima várás ákkastallamiid sihke guovtte doaktára sierra cealkámuša. Cealkámuša oažžuma várás áhpehis olmmoš ferte čielggadit sivaid, maid vuođul áhpehisvuođa gaskkalduhttima ohcat. IežasDáhttu2020-kampánja gáibida, ahte luohpat ákkastallamiin ja doaktára cealkámušaid gáibideamis. Dego stuorámus oasis earáge Eurohpá riikkain, maiddái Suomas galgá oažžut áhpehisvuođa gaskkalduhttima áhpehis olbmo iežas bivdaga vuođul.
Dálá vuogádaga mielde vuosttas doaktára cealkámuš ohccojuvvo vuođđodearvvasvuođafuolahusas ja nubbi spesiálabuohccidivššus. Dálá lága mielde áhpehisvuođa gaskkalduhttima – nu dálkkaslaš go kirurgalaš – galgá bargat doaibmalobi ožžon buohcceviesus, nappo riegádahttinbuohcceviesus. Dál goittotge badjel 95 % gaskkalduhttimiin dahkkojuvvojit dálkkaslaččat, nu ahte lága gáibádus spesiálabuohccidivššus lea dálkkaslaš gaskkalduhttimiid oasil dárbbašmeahttun.
